O Concello da Guarda conmemora o 8M poñendo o foco na repartición dos coidados
O 8 de marzo conmemórase o día Internacional da Muller, que nos lembra a continua loita das mulleres por unha igualdade real na sociedade.
No día de onte, proclamáronse diferentes manifestos no Concello da Guarda. O acto abriuno a concelleira de Xuventude, Carla Lomba, que fixo fincapé na importancia de que a loita pola igualdade continúe sen dar un paso atrás nos logros xa conseguidos. Ademais, puxo de relevo a repartición desigual entre homes e mulleres nas tarefas de coidados.
Esta mesma idea recalcouna Carmen Goyás, falando en representación do grupo de Resiliencia do CIM da Guarda. Expuxo como esta desigualdade causa que as mulleres reduzan xornada ou deixen os traballos, diminuíndo a súa independencia e capacidade económica a medio e longo prazo.
Para pechar o acto, Arantxa, Xiana e Alba, tres alumnas de 2º de Bacharelato do IES A Sangriña, intercalaron a lectura de poemas de mulleres co seu manifesto, no que reclamaron a importancia do consentimento para a liberdade sexual das mulleres e mozas.
