O Concello de A Guarda convida a colaborar na campaña solidaria #súmatedoasangue

O Concello de A Guarda e a Axencia Galega de Doazón de Sangue e Órganos (ADOS) impulsan de novo a participación nas campañas de doazón de sangue para garantir o labor dos hospitais galegos, que precisan preto de 10.000 doazóns de sangue cada mes para atender a todos os doentes.

O verán é a época de maior dificultade para a doazón de sangue. Os enfermos ingresados nos hospitais galegos seguen a precisar a solidariedade dos veciños e veciñas e, por iso, o Concello da Guarda distribuirá unha carta informativa na que se explican as vantaxes de doar sangue e os obxectivos desta nova campaña.

Poden doar sangue as persoas entre 18 e 65 anos e que pesen máis de 50 quilos. Persoal sanitario revisará a saúde das persoas que se acheguen ata a unidade móbil de ADOS, antes de levar a cabo a doazón de sangue.

Vindeira visita das unidades de doazón de sangue á Guarda:
A GUARDA
VENRES 17 de AGOSTO
10.00 a 14.00 e 16.30 a 21.00
SÁBADO 18 de AGOSTO
10.00 a 15.00

UNIDADE MÓBIL NA PRAZA AVELINO VICENTE ( NA PARADA DO BUS, FRONTE A FROIZ).

A Guarda, é unha das vilas galegas cunha maior taxa de doazóns de sangue, acadou en 2017 unha taxa de 82 doazóns por cada 1.000 habitantes, o obxetivo é manter a participación dentro das cifras que recomenda a Organización Mundial da Saúde (40 a 60 doazóns por 1.000 habitantes).

Queremos facer un agradecemento especial as persoas que participan cada ano nas campañas de doazón de sangue. Grazas a este xesto solidario, os hospitais atenden aos enfermos de cancro e leucemia e levan a cabo, cada día, unha media de 2.700 urxencias, 500 intervencións cirúrxicas e 3 transplantes de órganos e tecidos.

Neste verán os enfermos non toman vacacións e moitas persoas dependen deste xesto solidario para recuperar a saúde.

Precisamos 10 minutos da túa vida para salvar a doutros.