O “Entroido dos coles” inicia as celebracións do Entroido 2017 na Guarda
Este venres 24 de febreiro, pola mañá, deron comezo na Guarda as celebracións do Entroido 2017. Ás 12 horas tivo lugar a primeira das actividades programadas para estes días de festa, na que os protagonistas foron os alumnos e alumnas dos centros escolares.
Este venres 24 de febreiro, pola mañá, deron comezo na Guarda as celebracións do Entroido 2017. Ás 12 horas tivo lugar a primeira das actividades programadas para estes días de festa, na que os protagonistas foron os alumnos e alumnas dos centros escolares.
No “Entroido dos coles” deste venres, os cativos e cativas realizaron un desfile polas rúas da Guarda para amosar os seus disfraces a tódolos veciños e veciñas. O desfile comezou na Alameda e percorreu a rúa de Galicia ata chegar á Esquina do Galo. Entre os participantes puidéronse ver traxes en homenaxe a diferentes artistas como Dalí ou Velázquez, pescadoras/os cos seus produtos do mar, disfraces inspirados en ‘Charlie e a fábrica de chocolate’ e unha gran variedade de froitos da horta como millo, patacas, cenorias, tomates, chícharos, etc. xunto aos granxeiros e granxeiras, entre outros.
Deste xeito os nenos e nenas da vila quentaron motores para os seguintes días de festa e as numerosas actividades que dende o concello propoñen. Mañá, día 25, celébrase o “Sábado da mocidade”. A primeira cita do día será ás 17,30 horas no Centro Cultural, coa proxección do filme Vicky El Vikingo, á que os nenos e nenas poden acudir cos seus disfraces. Pola noite a Carpa da Alameda acollerá, ás 23,30 horas, o concerto do grupo pontevedrés Gold and Colt, tras o cal terá lugar á 1 da madrugada a gran novidade deste ano: o Concurso Drag Queen Guardés. Ó rematar o concurso, celebrarase a “Festa hortera” con DJ Celig.
O seguinte día, domingo 26 de febreiro, continúa a festa co “Día das familias” e a actuación da orquestra Carambola na Carpa da Alameda ás 18 horas.
O luns de Entroido, día 27 de febreiro, haberá un Obradoiro de Máscaras e Pintacaras na Biblioteca Municipal ás 11,30 horas. Pola tarde, ás 18 horas na Carpa da Alameda, terá lugar o concerto do Trío Refugallo, un grupo de música tradicional infantil. E a partir das 19,30 horas continuará a festa coa Orquestra Estelares.
O entroido guardés vivirá o seu último e máis importante día o martes día 28, co Desfile de Entroido. Neste desfile-concurso os participantes percorrerán as rúas guardesas coas súas carrozas e comparsas. A saída do desfile será ás 17,30 horas da Esquina Famosa e despois haberá festa coa Charanga Os Charamujas, que xa irán acompañando o propio desfile.
Ademais, dende este venres e ata o martes 28 de febreiro, sete restaurantes da Guarda ofrecen un Menú de Entroido tanto para o xantar como para a cea, a 15 euros. Arruaz, Brisamar, Camping Santa Tecla, La Pizzicata, Novo Funil, Xantar e Xeito son os restaurantes da Guarda que ofrecen este menú composto por un primeiro prato de caldo, un segundo de lacón con grelos e unha sobremesa tamén típica nestas festas: filloas ou orellas de Entroido, no que están incluídos viño e café.
A música, os disfraces, a comida e a festa xúntanse estes días na Guarda para que veciños, veciñas e visitantes vivan un entroido inesquecible.
