O luns 11 impartirase na Guarda unha sesión formativa sobre o alzheimer

O luns 11 de novembro, de 9:30 a 13:30 horas, AFAGA (Asociación de Familiares de Enfermos de Alzhéimer e outras Demencias de Galicia) vai impartir no Salón de Plenos do Concello da Guarda, unha sesión formativa sobre Alzheimer e outras demencias.

A sesión vai dirixida principalmente a coidadores/as de persoas cunha demencia neurodexenerativa, pero tamén a persoas diagnosticadas en fase moi temperá así como a calquera persoa interesada na temática.

O obxectivo é formar, orientar e axudar a persoas que se atopen nesta situación, achegando coñecementos e recursos para poder afrontar mellor a enfermidade e mellorar a calidade de vida da persoa con demencia e da súa familia.

As demencias teñen unha alta prevalencia (estímase que afectan ao 31,25% das persoas que superan os 85 anos), especialmente en Galicia, cunha poboación altamente envellecida. Ademais, o contexto rural experimenta un fenómeno de sobre envellecemento ao que se lle engade unha escaseza de servizos e ausencia de intervencións.

Esta realidade non só afecta á persoa que padece a enfermidade, senón tamén a todo o núcleo familiar. Por este motivo ponse a disposición das persoas afectadas esta formación gratuíta, que será impartida por unha psicóloga e unha traballadora social especializadas na temática.

FADEAL (Federación Atlántica de Asociacións de Familiares de Persoas con Alzheimer e outras Demencias), co financiamento da Deputación de Pontevedra e en colaboración do Concello de A Guarda, impartirá esta sesión formativa gratuíta enmarcada no proxecto Alzheimer de Preto.