O Trail do Trega cumpre a súa oitava edición dando un paso máis cara “á normalidade”

• A carreira guardesa porá o punto e final á Pontevedra Trail League que se ten celebrado neste ano 2021.

A praza do Reló, ao carón da casa consistorial da Guarda, foi o escenario da presentación na mañá de hoxe da VIII edición do Trail do Trega.
Nela asistiron o deputado de deportes de la Deputación de Pontevedra, Gorka Gómez, a Concelleira de deportes da Guarda, Montserrat Magallanes, e o director da carreira, Serafín Martínez da empresa noko 360, organizadora do evento.

Serafín Martínez destacaba a “consolidación desta proba, que vai pola súa oitava edición” cun aumento significativo de atletas cada ano, xa que “a día de hoxe, e faltando un día para o peche de inscricións, superamos os 450 participantes”. Facía mención ao “entorno único do Trail do Trega, un dos lugares máis visitados de Galicia.”
Sobre o percorrido mencionaba que “sempre lle gustou aos corredores, a pesares de que non se poden facer demasiadas modificacións cada ano xa que o monte é o que é”.
O deputado de deportes provincial Gorka Gómez, na súa intervención, facía referencia aos “tres trails, que con este, celébranse este ano no Baixo Miño, destacando o seu valor paisaxístico”. A aposta da deputación polo deporte sumado á visita a lugares tan emblemáticos da provincia
Agradecía ademais que “empresas como noko 360, apostasen por eventos nun ano tan complicado como este, no que a organización faise aínda máis difícil por todos os protocolos que conleva a loita contra a covid-19”

Pechaba o acto, Montserrat Magallanes, desculpando en primeiro lugar a ausencia do alcalde da Guarda, Antonio Lomba que se “atopaba precisamente na deputación tentando traer máis fondos para A Guarda”
En canto ao Trail, destacaba que se celebraba no “buque insignia do concello, como é o Monte Santa Trega, cos seus castros e espectaculares vistas”. Animaba á xente a acudir este domingo, xa que “se fixo un pacto para que nesta zona de Galicia, se mantivesen estes espectaculares días de sol”

Recordar que a carreira dará inicio ás 10.30 horas dende a Alameda da Guarda para realizar un percorrido de 15 kms con 800 metros de desnivel.
As inscricións para participar no Trail do Trega , pecharanse ás 23.59 horas deste mércores. Os que o desexen aínda poden anotarse en www.traildotrega.com