O vindeiro martes 16 de abril abre o prazo de inscrición para as Andainas do Concello da Guarda 2024 en Pontevedra

Esta actividade consiste na realización de andainas pola provincia de Pontevedra organizadas pola Concellería de Eventos Deportivos da Guarda.

As andainas combinan o deporte co coñecemento doutros lugares achegados na nosa provincia cunha paisaxe e elementos patrimoniais destacados, contan cun calendario de 4 andainas repartidas entre a primavera e o outono.

Esta actividade organizase cun autocar para o traslado dos participantes e con guías interpretativos da natureza que acompañarán ao grupo. A distancia destas rutas rondan entre os 10 e 15 km polo que as persoas interesadas deberán atoparse en condicións físicas adecuadas para realizar andainas duns 15 km e con certa dificultade polo desnivel.

A primeira andaina será en maio e recorrerá a parte do concello de Covelo da Vía Mariana que foi recuperada e que une Braga con Muxía. A segunda será en xuño polo que se escolleu unha saída especial coa visita da Illa de Cortegada que pertence ao Parque Nacional Illas Atlánticas. A mañá estará reservada a andaina á illa e despois percorrerase a ruta do Carreirón na Illa de Arousa con gran valor natural. Despois do descanso do verán retomase coa saída de setembro polo interior cunha nova ruta do río Xabriña en Mondaríz e pecharase en outubro co Camiño de Taberneiro en Pazos de Borbén.

As prazas son limitadas polo que se abre un prazo de inscrición para os interesados do martes 16 o xoves 25 de abril. O venres 26 de abril informarase aos interesados da lista de admitidos.

Máis información e inscrición na Casa dos Alonso (terceira planta) ou ben a través dun mail en turismo@aguarda.es ou no tel. 986614546, aínda que se priorizara a inscrición presencial.

Este é o calendario das andainas:

– Sábado 4 de maio: Tramo da Vía Mariana (Covelo)

– Sábado 8 de xuño: Visita á Illa de Cortegada e ruta polo Carreirón da Illa de Arousa

– Sábado 28 de setembro: Ruta polo río Xabriña en Mondariz

– Sábado, 19 de outubro: Camiño de Taberneiro en Pazos de Borbén