O Xeodestino Ría de Vigo e Baixo Miño segue impulsando o turismo con proxectos conxuntos
O Xeodestino Ría de Vigo e Baixo Miño continúa o seu firme avance na implantación de proxectos turísticos conxuntos, cunha clara aposta pola posta en valor dos seus recursos naturais e patrimoniais.
Os 13 concellos implicados no Plan de Sostibilidade Turística en Destino ‘A Despensa de Galicia’ (A Guarda, Baiona, Fornelos de Montes, Gondomar, Mos, Nigrán, O Porriño, O Rosal, Oia, Pazos de Borbén, Redondela, Tomiño e Tui) reuníronse na Guarda para facer balance do xa realizado e as futuras accións.
A presidenta da Asociación de Desenvolvemento Rural Galicia Suroeste EuRural e alcaldesa de Tomiño, Sandra González, destacou a importancia do traballo colaborativo que se está a realizar, “creando un modelo de desenvolvemento turístico que non só promove os nosos recursos, senón que tamén aposta pola conservación e posta en valor do noso territorio a longo prazo”.
O vindeiro día 16 presentarase no Porriño o inventario de recursos turísticos do territorio, unha ferramenta que permitirá contar con información para establecer as prioridades de traballo nos miradoiros, rutas de sendeirismo e o cicloturismo, que reflicte o compromiso coa promoción dun turismo sostible.
Actualmente hai tres proxectos principais do Xeodestino Ría de Vigo e Baixo Miño: a recuperación dunar da baía de Cesantes, en Redondela; a intervención para a recuperación ambiental na Foz do Miñor entre Baiona e Nigrán; e a mellora da eficiencia enerxética e da iluminación artística da Catedral de Tui.
O PSTD ‘A Despensa de Galicia’ forma parte do Plan de Recuperación, Transformación e Resiliencia (PRTR), a estratexia formulada polo Goberno de España para acelerar a recuperación social e económica tras a pandemia da COVID-19 e que conta co apoio e o financiamento da Unión Europea a través do programa NextGenerationEU.
