Programación familiar para esta fin de semana na Guarda
• Fin de semana longa que rematará o 17 de maio coa conmemoración do Día das Letras Galegas
• Un espectáculo de clown e acrobacias e o recordo a Florencio Gurriarán marcarán a axenda da Ponte das Letras Galegas na Guarda
Na tarde deste sábado 14 de maio (18:00h, Auditorio de San Benito), a diversión está asegurada para toda a familia co espectáculo de clown familiar C’est pas possible co que a artista Marta Iglesias (Marta Sempre Arriba) convídanos a comprobar que si é posible saír da rutina. Todos nós temos sentido algunha vez como a preocupación por ser eficaces, cumprir prazos e expectativas lévanos a esquecernos de gozar co que facemos.
Acostumada a traballar na sombra, a técnica e rigger é a encargada de monta-lo pórtico de aéreos e preparalo todo para que a Gran Artista brille na escena. Responsable, disciplinada, eficaz e profesional, cada día pon o mellor de si mesma. Pero hoxe a súa rutina vaise ver alterada pola ollada do público, espertando o seu lado torpe e fantasioso, levándoa a facer aquelo que cría imposible.
En linguaxe clown e con acrobacia aérea, levará ao público a empaparse das emocións que esta personaxe vive na escena.
A diversión para toda a familia continuará o martes 17 de maio ás 12:00h. na Praza de Avelino Vicente co Contacontos Florencio nas Ondas, no que a narradora Raquel Queizás achegaranos a figura do autor homenaxeado este ano polas Letras Galegas. Mediante a recreación dun antigo programa de radio descubriremos a vida de película deste personaxe, medio espía, medio fuxitivo, que contribuíu a dignificación de Galicia e a normalización da nosa fala nunha época escura.
Xa para rematar o día festivo volverá ao Auditorio de San Benito o tradicional Festival polas Letras Galegas, que congrega aos principais grupos de baile e música tradicional da nosa localidade para render tributo a Florencio Gurriarán. Contará coa presenza de Grupo de Baile Xamaraina, Grupo de Pandereteiras Vento Mareiro, Doxe nun ano, A Boalleira, Studio 88, Trebón dos Xidos, Na beira do Miño (CEIP A Sangriña), Anduriñas (CEIP As Solanas), Churumbela e a Agrupación Cultural Guardesa. A cita será ás 19:00h.
FICHA-RESUMO DAS ACTIVIDADE
ACTIVIDADE: C’est pas posible
LUGAR: AUDITORIO SAN BENITO
DATA: 14 de Maio de 2022
HORA: 18:00h.
Duración: 45 minutos
ACCESO: DE BALDE, sen inscrición previa. Para tódolos públicos
ACTIVIDADE: Florencio nas Ondas
LUGAR: Praza de Avelino Vicente
DATA: 17 de Maio de 2022
HORA: 12:00h.
Duración: 45 minutos
ACCESO: DE BALDE, sen inscrición previa. A partir de 5 anos
ACTIVIDADE: Festival polas Letras Galegas
LUGAR: Auditorio de San Benito
DATA: 17 de Maio de 2022
HORA: 19:00h.
ACCESO: DE BALDE, sen inscrición previa. Tódolos públicos
