Proxección da Curtametraxe “Antes de que se poña o sol”, de Nani Matos no Centro Cultural da Guarda
A curtametraxe “Antes de que se poña o sol”, escrita e dirixida polo guardés Nani Matos, proxéctase este vindeiro 31 de maio ás 21:00h, no Centro Cultural da Guarda. Contaremos coa presenza do seu director e co equipo da mesma.
A curta foi seleccionada para participar en varios festivais nacionais e internacionais de cinema, consolidando a súa presenza no circuíto cinematográfico global.
A curta fala dos conflitos familiares entre os pais e os fillos adultos. Un drama familiar ambientado no mundo rural que nos achega á dificultade de aceptar o paso do tempo e respectar as decisións dos demais.
Rodada na parroquia de Rebordáns en Negreira, a curtametraxe conta cun elenco de luxo formado por Mela Casal, Victoria Teijeiro, Machi Salgado, Teté García, Xosé M. Esperante, e o propio Nani Matos, quen participa por primeira vez como actor nunha das súas curtas. Ademais, poderemos ver o debut no cinema da moza guardesa, Sabela Rodríguez.
“Antes de que se poña o sol” estreouse no Teatro Principal de Pontevedra e, ata o momento, leva acadado máis de 60 seleccións en festivais nacionais e internacionais, ademais de 23 premios. A curta foi seleccionada no Festival de Málaga e foi finalista aos Premios Mestre Mateo que outorga a Academia Galega do Audiovisual e aos Blogos de Oro, premios do cine Independente Español. Recentemente, foi seleccionada no Seoul International Senior Film Festival en Corea do Sur e no Rustenburg Film Festival en Sudáfrica.
Entre os seus galardóns destacan, entre outros, o Premio do Xurado á Mellor Curtametraxe de Ficción e o Premio do Público no Festival Nudos Cortos de Sigüenza, Guadalajara. O Premio Especial do Xurado e o Premio á Mellor Dirección no Festival Internazionale del Cinema de San Giovanni en Génova (Italia). O Premio do Público no Festival Internacional de Berriozar. Navarra ou o Premio á Mellor Actriz no Cimemafost en San Fost de Campsentelles, en Barcelona.
A Facultade de Belas Artes de Pontevedra colaborou coa curtametraxe, contando co alumnado vencellado á aula de audiovisuais que participaron nos distintos departamentos da produción.
Nani Matos é actor, director e guionista. “Antes de que se poña o sol” é a súa cuarta curtametraxe, tras “Dies dei” (2009), “Flores para Amalia” (2013) e “Lurna” (2016). Entre todas, suman máis de 200 seleccións nacionais e internacionais e preto de 50 premios. “Lurna” é a súa curta máis premiada, seleccionada en máis de 25 países e acadando 32 premios. Actualmente, Nani Matos está inmerso na escritura de varios proxectos e na interpretación.
Esta actividade está subvencionada polo CIM (Centro de Información á Muller) do Concello da Guarda e polo Ministerio de Igualdade dentro do Programa de Pacto de Estado contra a Violencia de Xénero
