Remata o campamento urbano cun gran éxito de participación

• O Concello da Guarda continúa apostando firmemente pola conciliación no verán aumentando o número de prazas e a duración do campamento urbano.

O campamento urbano 2021 do Concello da Guarda ven de rematar cun notable éxito de participación cun total de 60 nenos e nenas que participaron nas diversas actividades programadas que tiveron lugar nos colexios de Solanas, Sinde e no Castelo de Santa Cruz e para o que estiveron divididos en grupos burbulla co obxectivo de reducir os riscos de contaxio.

Este ano o equipo de goberno considerou prioritario atender as necesidades das familias guardesas en relación á conciliación entre vida familiar e laboral durante a época estival, e para iso decidiu aumentar o número de prazas de 40 a 60, o que supuxo un incremento dun 50% respecto a anos anteriores.

Ademais alongouse o período de duración do campamento e se reservou unha porcentaxe de prazas para nenos e nenas con diversidade intelectual, que estiveron apoiados por monitores con formación específica, aproveitando este entorno para favorecer a súa plena integración.

Como ven sendo habitual o Concello da Guarda solicitou á Secretaría Xeral de Igualdade a subvención para conciliación que cubre actividades deste tipo, quedando en lista de agarda nun primeiro momento. O custo do campamento ascende a 18.000€ aproximadamente e coas aportacións das familias só se pode cubrir unha terceira parte do total.

Malia este contratempo, o equipo de goberno apostou por seguir adiante coa idea de celebrar o campamento e decidiuse poñelo en marcha con fondos propios, retendo cantidades doutras partidas orzamentarias e incluso solicitando á Deputación de Pontevedra destinar fondos do Plan Concellos para asumir parte do custo do campamento, en lugar de para outras actividades que estaban planificadas inicialmente.

En definitiva, tanto o Alcalde como o resto do equipo de goberno consideraron prioritario atender as necesidades das familias e apostouse por dedicar os recursos, tanto económicos como humanos, que foran necesarios. Tamén agradece o tempo e esforzo que as técnicas municipais tiveron que inverter para sacar adiante a contratación nun período reducido, persoal que podería estar dedicado á contratación doutros servizos, pero que o equipo de goberno preferiu destinar a solucionar os problemas reais da cidadanía.

A finais de agosto recibimos unha moi boa noticia da Secretaría Xeral de Igualdade que, grazas a unha ampliación do crédito na liña de conciliación, notificou ao Concello a aprobación da subvención polo total da cantidade que se solicitara inicialmente. Con esta aportación poderá sufragarse gran parte do custo do campamento, e poderán destinarse os fondos propios inicialmente retidos no Concello para outras actuacións necesarias para o pobo.