O Sistema Arbitral de Consumo, regulado polo Real decreto 231/2008, ten como finalidade atender e resolver con carácter vinculante e executivo para ambas as partes, as queixas ou reclamacións dos consumidores e usuarios, sen prexuízo da protección administrativa e xudicial.
Quedan excluídos do obxecto de arbitraxe as seguintes situacións:
- Aquelas nas que haxa resolución xudicial firme e definitiva.
- As materias inseparabelmente unidas a outras sobre as que as partes non teñan poder de disposición.
- As cuestións nas que deba intervir o Ministerio Fiscal.
- As cuestións nas que concorran intoxicación, lesión, morte ou existan indicios razoábeis de delito.
O Sistema Arbitral está composto pola Xunta Arbitral de Consumo e polos colexios arbitrais.
A Xunta Arbitral de Consumo de Galicia é un organismo vinculado directamente á Xunta de Galicia a través do Instituto Galego de Consumo. A súa sede está en Santiago de Compostela e está composta por un presidente e un secretario.
Para atender as solicitudes de arbitraxe constitúense colexios arbitrais, que son os órganos encargados de coñecer e ditar o laudo arbitral sobre cada cuestión sometida á arbitraxe.
EN QUE CONSISTE?
A arbitraxe de consumo é unha vía extraxudicial e voluntaria que permite resolver, dun xeito rápido, eficaz e gratuíto, os desacordos que poidan xurdir entre os consumidores/usuarios e os empresarios.
As vantaxes da Arbitraxe de Consumo son:
- Rapidez: a tramitación realízase nun curto período de tempo.
- Eficacia: resólvese mediante laudo arbitral, sen que faga falta acudir á vía xudicial ordinaria.
- Gratuidade: a tramitación é de balde; soamente a práctica dalgunhas probas periciais, realizadas a petición da parte, pode supoñer algún pequeno custo.
- Voluntariedade: ambas as dúas partes deciden libremente que sexa a Arbitraxe de Consumo quen resolva os seus desacordos.
- Executividade: o laudo arbitral é de obrigado cumprimento, como se dunha sentenza se tratase.
COMO ADHERIRSE?
As asociacións de consumidores e de empresarios poden adherirse ao sistema , para colaborar na promoción e Administración da Arbitraxe de Consumo, subscribindo o correspondente compromiso de adhesión, conforme o modelo normalizado que acompaña ao acordo de constitución da Xunta Arbitral de Consumo de Galicia, publicado mediante resolución do 8 de xullo de 1994.
[Prema aquí para ver os enderezos dos colexios e xuntas arbitrais]