A «barferencia» sobre a represión franquista contra as mulleres abrirá a programación deste 2018

A cita será este venres e versará sobre a represión sufrida polas mulleres a consecuencia da Guerra Civil, coa participación da xornalista Montse Fajardo.

Este venres, 12 de xaneiro, terá lugar na cafetería Oasis o terceiro faladoiro do ciclo de «Barferencias» programadas para este inverno. Baixo o título «A represión franquista contra as mulleres», a xornalista e  especialista en memoria das mulleres, Montserrat Fajardo, achegaranos a esta realidade histórica do século XX a partir das 20.30 horas.

Fajardo forma parte do equipo redactor do programa «Memoria das Mulleres», promovido polo Concello de Pontevedra, ao abeiro do cal ten investigado sobre a represión franquista sobre as mulleres na provincia de Pontevedra e na comarca do Baixo Miño.

O froito destas investigacións tense divulgado a través de varias publicacións –«Do gris ao violeta. Achega á historia das mulleres pontevedresas»; «Matriarcas» ou «Un cesto de mazás»– así como mediante a impartición de charlas como a que poderemos escoitar este venres no Oasis, en centros de ensino, asociacións culturais e outros centros públicos.

As «Barferencias» continuarán os próximos días 2 de febreiro e 2 de marzo de 2018, con temáticas referentes á rasa costeira e a lamprea.