VILA PRAIA DE ÀNCORA, EN CAMINHA, INAUGURA O “PASEO DE A GUARDA”
Este evento foi unha maneira de inmortalizar os lazos que unen ambas vilas.
O municipio portugués de Caminha, inaugurou no porto de Vila Praia de Àncora o novo “Paseo de A Guarda”, unha maneira de inmortalizar os lazos que unen estas dúas vilas veciñas separadas polo río Miño.
O “Passeio de A Guarda”, que así é como se escribe na lingua lusa, inaugurouse coa presenza tanto do alcalde de Caminha, Miguel Alves, coma o da Guarda, Antonio Lomba. Este evento, apuntou Miguel Alves, é unha maneira máis de “estreitar relacións” entre os dous Concellos.
O nome desta rúa celebra tamén a orixe pescadora de Vila Praia de Àncora e da súa poboación. Tras unha investigación científica sobre a historia desta vila, Aurora Rego, reparou en que en 1825, un pescador chegado dende A Guarda, Antonio Verde, foi unha das persoas, xunto con outros pescadores e as súas familias, que foron determinantes para o desenvolvemento da pesca e para a expansión demográfica.
Os apelidos destes galegos aínda se encontran entre a poboación da vila.
Para o alcalde da Guarda, esta homenaxe, da que dixo sentirse moi honrado, é un recoñecemento á participación dos guardeses no asentamento e desenvolvemento de Vila Praia de Àncora. Este feito, afirmou, ven a facer máis intensas as relacións entre a vila de Caminha e a de A Guarda.
Miguel Alves, pola súa banda, falou da importancia de que ambos concellos formen unha familia cultura, xeográfica e agora tamén, “de sangue”.
