17 fotografías conforman a exposición «Raíces Celtas en la Amazonía venezolana»

O martes día 21 de agosto de 2018 realizouse a inauguración da mostra fotográfica «Raíces celtas en la Amazonía venezolana» da autoría de Oscar Noya-Alarcón.

Na inauguración, realizada na Sala de Exposicións do Centro Cultural da Guarda, interviron a Concelleira de Cultura, Elena Baz, o Alcalde da Guarda, Antonio Lomba e Oscar Noya-Alarcón, autor das fotografías realizadas no continente americano, durante o seu traballo coma doutor na erradicación da oncocercosis, unha enfermidade que afecta a numerosas comunidades illada da amazonía.

Ao acto de inauguración asistiron case medio centenar de persoas, que amosaron gran interese por unhas instantáneas recollidas en espazos pouco habituais para nos, a selva amazónica.

Nesta mostra os visitantes poden apreciar fotografías en cor que amosan o traballo en operacións de asistencia sanitaria a comunidades indíxenas illadas, sobre todo poboacións «yanomamis» da Amazonía venezolana, así coma dúas fotografías da vila da Guarda, onde o autor ten moitos familiares e coñecidos.

O Doctor Oscar Noya-Alarcón, venezolano e español de descendencia guardesa, é un médico parasitólogo do Centro Amazónico de Investigación e Control de enfermidades tropicais e asociado ao Instituto de Medicina tropical, traballa dende fai 10 anos no Programa de eliminación de oncocercosis no foco sur de Venezuela, último reduto no continente americano (xunto con Brasil) dunha enfermidade parasitaria que envellece a pel e deixa cegas ás persoas. O grupo de traballo de saúde, asiste a máis de 350 comunidades indíxenas de difícil acceso na selva, atendendo a máis de 16.000 persoas.

Estas 17 fotografías de elementos humanos e naturais da Amazonía venezolana son parte do escenario onde se desenrola este importante trabalo de eliminación dunha enfermidade no continente americano e de mellora dos indicadores de saúde, partindo do respecto dunha das culturas que alí habitan e resgardando o medio ambiente que sustenta esta parte importante do planeta.

Fai moitos anos na época colonial no continente americano, se introduciron xunto cos escravos moitas enfermidades infecciosas, entre elas a oncocercosis, unha parasitosis que produce un envellecemento prematuro da pel e que ten a súa peor consecuencia na diminución da agudeza visual que pode chegar ata a cegueira irreversible, por isto esta enfermidade tamén é chamada a cegueira dos ríos. Esta enfermidade se introduciu en seis países de América: México, Guatemala, Colombia, Ecuador, Brasil e Venezuela, e xa está eliminada na case totalidade dos países, quedando só un foco desta oncocecosis entre a selva amazónica de Brasil e Venezuela afectando a poboacións indíxenas yanomami, Yekwana e hoti.

Dentro do Programa Nacional de Eliminación de Oncocercosis en Venezuela se conta cun equipo de traballo composto por médicos, biólogos, técnicos de oncocercosis e entomólogos dos cales día a día se busca a maneira de abordar ás máis de 350 comunidades indíxenas afectadas.

A exposición se pode visitar ata o 13 de setembro nas instalacións do Centro Cultural da Guarda, en horario de Luns a Venres de 9:00h a 14:00h e os sábados en horario de 10:00h a 13:00h.