A Guarda presenta un libro en homenaxe á historia de mulleres anónimas da vila

No ano 2022 deu comezo o primeiro obradoiro “Quérome, cóidome” promovido polo CIM do Concello da Guarda.

Naceu co obxectivo de aumentar a súa autoestima, apoderar e tecer redes de apoio entre as mulleres maiores de 55 anos das parroquias da Gándara e de Camposancos.

No 2024, na súa terceira edición, apostouse por dar visibilidade ás participantes, ao seu saber e experiencias. Todo o recollido reflíctese en “Mulleres. Historia de vida e igualdade”.

Este libro recolle a visión de 20 mulleres con idades comprendidas entre os 59 e os 89 anos sobre: traballo produtivo, reprodutivo, loito, tempo de lecer e tabús. O libro contén relatos que amosan os cambios producidos ao longo do tempo, desde as súas nais ata o que hoxe ven nas vidas de fillas, netas e bisnetas.

O Concello da Guarda quere render unha merecidísima homenaxe a todas esas mulleres anónimas da nosa vila, que son realmente as verdadeiras protagonistas. A presentación terá lugar o vindeiro xoves, 24 de abril ás 20:00h no Centro Cultural da Guarda.