A Guarda promociónase en FITUR coma un destino turístico de Excelencia Europea
O Concello da Guarda estivo presente esta semana da Feria Internacional de Turismo de Madrid (FITUR). Da man do alcalde, Antonio Lomba, da Concelleira de Turismo, Montserrat Magallanes e da Técnico da Turismo do Concello, Rosalía Verde, A Guarda estivo presente neste punto de encontro global entre profesionais do turismo.
Na xornada do mércores, 20 de xaneiro, os representantes guardeses tiveron unha reunión de traballo sobre a redacción do expediente da candidatura do Esteiro do Miño coma Patrimonio da Humanidade da Unesco como Paixase Cultural. Neste encontro, entre outras cousas, definiron os prazos e o acceso á documentación por parte dos redactores.
Ademais mantiveron contacto con distintos touroperadores para incluír a comarca do Baixo Miño nos paquetes e circuítos que ofrecen aos seus clientes.
Os representantes da Guarda reuníronse tamén con responsables municipais doutros concellos, coma por exemplo Llanes ou Ribadesella, cos que compartiron experiencias e posibles iniciativas coas que potenciar o turismo activo.
Destinos EDEN
O Concello da Guarda foi convidado ao stand de TurEspaña para acudir a presentación dos Destinos Europeos por Excelencia – EDEN -, dos que A Guarda, forma parte.
Neste acto, a Directora Xeral de TurEspaña, Marta Blanco, deu a coñecer as diferentes campañas de promoción para promover o turismo nos distintos destinos EDEM españois.
Ademais houbo unha xornada técnica na que os distintos Concellos que teñen este distintivo definiron as liñas de acción dos EDEM para o 2016 por parte da Secretaría Xeral de Turismo.
O alcalde da Guarda, a Concelleira de Turismo e a Técnico do Concello, pecharon a xornada asistindo á presentación da “Eurocidade Tui-Valença”, na que se proxectou un vídeo no que se recordaban os “mil anos” de historia conxunta de ambas cidades.