O colexio As Solanas non autoriza a colocación do valado de hockey no seu pavillón

O goberno municipal da Guarda presentou o proxecto de colocación dunha valado de hockey no pavillón do colexio As Solanas con cargo ao Plan Concellos 2016 da Deputación de Pontevedra. Tratábase dunha actuación moi demandada polo colectivo, que habitualmente utiliza o pavillón para realizar adestramentos. Desta maneira, os equipos de hockey guardeses poderían xogar nel partidos oficiais, aínda que con certas limitación debido ao tamaño da pista. 

Despois de meses de xestións coa  Directiva do centro e da unidade técnica da Xefatura Provincial de Educación, o Concello obtivo a autorización por parte da Xefatura Provincial para a realización das melloras, cuxo orzamento  ascende aos 20.800 euros.

No que respecta ao centro, despois de satisfacer os requerimentos de información e documentación solicitados tanto ao Concello como á Xefatura Provincial, a directora comunica á Corporación Municipal que o claustro de profesores e o consello escolar non autorizan a colocación do valado de hockey. Os motivos alegados fan referecia á perigosidade que representa para o alumnado do centro e que a colocación do valado non permitiría as medidas oficiais para a práctica doutros deportes no pavillón.

O concello lamenta que, despois de meses de traballo, tras a consecución do financiamento necesario par aa instalación e da autorización da Xefatura Provincial de Educación, atendendo ás demandaa dos deportistas e das súas familias, esta actuación non conte cos parabéns da comunidade educativa.

Nos días pasados comunicouse á Directiva do club A Guarda Hockey Liña a decisión dos responsables do centro. Por parte dos deportistas acordaron buscar outras posibilidades para a instalación dun valado. De non atopar outro pavillón no que se autorice a súa colocación o concello deberá destinar os cartos para outro fin.