«Proxecto táctil»: a arte para ver coas mans xa pode visitarse no Centro Cultural
A mostra, concibida especificamente para ser tocada, forma parte do programa de actividades do Ano do Patrimonio da Deputación de Pontevedra e poderá visitarse ata o vindeiro 4 de novembro.
Onte inaugurouse no Centro Cultural da Guarda a exposición ‘Proxecto táctil’, coa que a Deputación de Pontevedra contribúe á sensibilización sobre o dereito de acceso á arte das persoas con dificultades visuais. Na apertura da exposición participaron o alcalde do Concello da Guarda, Antonio Lomba; a concelleira de Cultura, Elena Baz; o director do Centro de Recursos da ONCE en Pontevedra, José Ángel Abraldes; a decana da Facultade de Belas Artes de Pontevedra, Silvia García; e o deputado de Cultura e Lingua, Xosé Leal.
O rexedor local comezou o acto sinalando que “sempre foron os artistas a punta de lanza das revolucións, que neste caso son unha punta de lanza para achegar a arte ás persoas con dificultades visuais”. Unha idea na que tamén incidiu o deputado de Cultura e Lingua, Xosé Leal, asegurando que “a xente do mundo da arte sempre foi a vangarda para achegarse ás diferentes realidades e rachar barreiras”.
Compre lembrar que ‘Proxecto táctil’ trata de salvar a prohibición de tocar as obras nos museos, o que impide que as persoas cegas poidan acceder á arte, posto que perciben os obxectos da súa contorna a través do tacto. Explicouno José Ángel Abraldes, indicando que “nós para ver as cousas temos que tocalas, por iso é tan importante poder tocar obras de arte, porque habitualmente nos Museos non podemos”. O director do Centro de Recursos da ONCE lembrou que neste proxecto “participamos como formadores das artistas que crearon as pezas, ensinándolles como percibimos a nosa contorna as persoas con dificultades visuais, e como coñecemos os materiais que se usan nas obras, pola súa textura e pola calor que nos transmiten”.
Unha idea na que incidiu Silvia García ao asegurar que “tocar é moi importante porque é un sentido que nos está quedando esquecido”. A decana de Belas Artes, que ademais é a comisaria da mostra, afirmou que nun mundo “no que manda o imperio do visual, porque cada vez temos máis cousas a través dunha pantalla, esquecémonos de que hai outras maneiras de coñecer o mundo”.
O deputado de Cultura e Lingua, Xosé Leal, asegurou ademais que “con esta mostra e con esta experiencia o que pretendemos é crear conciencia entre a xente do común sobre a diversidade, para que todos e todas entendamos que a diversidade é positiva”. O deputado nacionalista anunciou que durante o tempo que permaneza na Guarda pasarán todos os colexios do concello a visitala “para xerar masa crítica entre os rapaces e as rapazas”. Por último, Leal tamén defendeu que “as Administracións debemos colaborar con outras institucións, como neste caso a Facultade de Belas Artes, e co tecido asociativo, como a ONCE, para superar barreiras e procurar que a arte sexa máis inclusiva”.
Ao respecto do ‘Proxecto Táctil’ tamén indicou que “non queremos que sexa unha mostra específica para persoas con discapacidade, senón que sexa para todos e para todas, porque niso consiste á inclusión” .
Sobre a exposición
Unha decena de creadoras da Facultade de Belas Artes e da escola de moda ESDEMGA son as autoras de outras tantas obras que compoñen esta exposición, coa que se pretende explicar como ‘ver’ coas mans e que durante este ano visitará cinco emprazamentos da provincia de Pontevedra cun duplo obxectivo: o de permitir que as persoas con discapacidade visual accedan á arte contemporánea de xeito normalizado e o de concienciar ao conxunto da poboación sobre as necesidades das persoas cegas. Para percorrer esta exposición convídase ás e aos participantes a facer uso de antefaces para percibir as obras doutro xeito. Ao ter que ‘ver’ as obras sen facer uso do sentido da vista, pódese experimentar a forma en que as persoas cegas perciben os obxectos.
“Proxecto Táctil” está comisariada pola decana da Facultade de Belas Artes, Silvia García. Nesta ocasión, e a diferenza doutros proxectos cuxas pezas son creadas para ser tocadas, a comisaria elixiu obras que xa estaban realizadas pero que se adaptaban á idea de “ser táctiles” pola multiciplidade de texturas e materiais.
Así, as teas, os metais, os vimbios, as escaiolas e as madeiras son os materiais que destacan na confección destas obras, cuxa autoría corresponde a Laura Álvarez, Andrea Domínguez Torres, Malú Feijoo, Alejandra Lago, Loaira Peres, Pilar Picas, Yolanda Ríos, Irene Romero, Anabel Santos Leites e Renata Sierra. A mostra foi presentada e exposta durante o mes de xuño na sede da Vicerreitoría da Universidade de Vigo en Pontevedra, a Casa das Campás, e no último trimestre do ano percorrerá os concellos de Caldas de Reis, A Guarda, O Porriño, e Lalín da man da Deputación de Pontevedra.
A exposición estará aberta ao público ata o próximo 4 de novembro no horario habitual do Centro Cultural, isto é, de 10 a 13 e de 17 a 20 horas de luns a venres, e os sábados en horario de mañá.
