A campaña de concienciación «O que se enchufa, recíclase» chega mañá á Guarda

A campaña «O que se enchufa, recíclase» chegará mañá á Guarda para concienciar e sensibilizar sobre a importancia da correcta xestión dos residuos de aparatos eléctricos e electrónicos (RAEE).

Para isto, dous asesores terán un punto informativo durante o venres 16, o sábado 17 e o martes 20 de marzo na Praza de Abastos (entre as 11 e as 14 h) e na Piscina Municipal (o venres e o martes entre as 16 e as 19 h). As persoas que se acheguen poderán informarse sobre os RAEE e coñecer os métodos de reciclaxe destes ao fin da súa vida útil. Ademais, poderán participar nun sinxelo xogo de ruleta co que conseguirán un agasallo.

Sobre a campaña

«O que se enchufa, recíclase» é unha iniciativa promovida pola Consellería de Medio Ambiente en colaboración con Ofiraee, co obxectivo de fomentar a correcta xestión dos residuos de aparellos eléctricos e electrónicos (tales como ferros, televisores, frigoríficos ou tablets) levándoos aos establecementos adheridos ou aos puntos limpos existentes nos concellos para a súa reciclaxe.

Os impulsores da campaña destacan que moitos dos materiais que compoñen os RAEE teñen un gran valor e recuperalos é unha forma de ‘minería’ urbana, respectuosa coa contorna e coa que se favorece o aforro dos recursos naturais. Para facilitar o labor de reciclaxe, a páxina web da campaña dispón dun mapa informativo sobre os puntos onde poden ser depositados os RAEE.