O Concello da Guarda recibirá mañá oficialmente ao Mecalia Atlético Guardés tras proclamarse Campioas de Europa
O Concello da Guarda celebrará mañá, mércores 28 de maio ás 20:30 horas, unha recepción oficial ao equipo feminino do Mecalia Atlético Guardés, actual conxunto da División de Honra Feminina de balonmán, tras facer historia no deporte galego este pasado domingo ao proclamarse Campioas de Europa da EHF European Cup.
O equipo guardés acadou este fito histórico despois de vencer ao MSK IUVENTA Michalovce na gran final continental, culminando ademais unha competición impecable na que permaneceron invictas durante todo o torneo.
O acto dará comezo ás 19:15 horas coa saída do autobús desde o pavillón municipal, iniciando un percorrido polas principais rúas da vila para compartir este éxito histórico coa veciñanza guardesa.
A ruta prevista será a seguinte: Paseo de Portugal, rúa Julia Vaquero, rúa Galicia e rúa Puerto Rico ata O Gallo, onde o autobús realizará unha primeira parada. Nese punto, as xogadoras baixarán para dirixirse á igrexa e realizar unha ofrenda floral.
Posteriormente, o percorrido continuará por rúa Galicia, Baiona, Rosalía de Castro, Coruña, Ourense, Praza Avelino Vicente, Manuel Álvarez, Circunvalación e San Caetano, regresando de novo por Circunvalación, Manuel Álvarez, Concepción Arenal e rúa Puerto ata a rotonda, onde se realizará unha nova parada.
Finalmente, o autobús retomará o traxecto por rúa Puerto, Concepción Arenal, Domínguez Fontela, Galicia e Puerto Rico ata O Gallo, onde as xogadoras descenderán para realizar a pé o último tramo ata a Casa do Concello, lugar ao que está prevista a chegada arredor das 20:30 horas.
Na Casa do Concello, o equipo será recibido polas autoridades municipais e, tras un breve acto de homenaxe institucional, as xogadoras sairán ao balcón da casa consistorial para saudar a todas as persoas asistentes e compartir coa afección este histórico triunfo para o deporte guardés e galego.
Ademais, tamén se renderá homenaxe ao Mecalia Atlético Guardés Cadete Feminino, que participarán igualmente no percorrido en autobús. O equipo vén de completar unha tempada histórica tras proclamarse campioas da Liga Ouro, máxima competición galega da categoría, un logro sen precedentes na historia da base do club.
As cadetes tamén estiveron moi preto de acceder á fase final nacional, competindo esta pasada fin de semana como equipo anfitrión da Fase Zonal do Sector Nacional do Campionato de España Cadete Feminino, celebrada no pavillón municipal da Sangriña, consolidando así o excelente momento deportivo que atravesa a canteira do club.
O Concello da Guarda anima a toda a veciñanza a participar nesta recepción e a acompañar aos equipos nunha xornada histórica para o deporte local e para toda a vila da Guarda.
