O alumnado dos colexios da Guarda asistiu ó espectáculo de música e danza sene-galego
O alumnado de tódolos colexios da Guarda puido desfrutar este pasado mércores, día 18 de maio, do espectáculo de danza e música sene-galego que tivo lugar no Auditorio de San Bieito da localidade.
O alumnado de tódolos colexios da Guarda puido desfrutar este pasado mércores, día 18 de maio, do espectáculo de danza e música sene-galego que tivo lugar no Auditorio de San Bieito da localidade.
A actividade, organizada pola Concellaría de Cultura do Concello da Guarda para tódolos centros escolares, tiña como finalidade mostrar a fusión das dúas culturas e dar a coñecer parte da música e danza africana.
Durante o evento, que durou dende as 11:30 ata as 12:45 da mañá, o grupo senegalés “Mbolo mooye doolé” fixo primeiro unha representación de bailes e música propias do seu país para despois, xunto ó Grupo Carainas, formado por nenos e nenas pandereiteiros, facer unha representación de danza galego-senegalesa. A continuación o grupo Carainas interpretou unha canción baseado no poema “O Cuco” de Manuel María, escritor homenaxeado este ano polo Día das Letras Galegas.
O grupo senegalés, ademais de realizar as actuacións, buscou en todo momento a complicidade e participación dos rapaces e rapazas asistentes que, ao final do acto, acabaron saíndo todos a bailar xunto a eles para rematar unha xornada que mesturou o ocio, a aprendizaxe e a integración cultural.
Deste xeito o alumnado, e tamén o profesorado da Guarda, participou nun espectáculo que logrou amosar mediante a fusión da danza galego-africana os lazos de unión que poden chegar a darse entre culturas e lugares tan diferentes e afastados.
