O Concello da Guarda solicita a súa incorporación á Área Metropolitana de Vigo
No último pleno aprobouse a proposta de Alcaldía, co apoio do BNG, solicitar a inclusión do Concello da Guarda na Área Metropolitana de Vigo.
No último pleno aprobouse a proposta de Alcaldía, co apoio do BNG, solicitar a inclusión do Concello da Guarda na Área Metropolitana de Vigo.
O alcalde xustifica a solicitude apelando á inminente constitución do organismo supramunicipal, ás vantaxes que terá para os veciños integrarse na Área e ós inconvenientes que implicaría quedar fóra da mesma.
Entre os acordos adoptados no pleno destaca o de sinalar como interese prioritario do Concello da Guarda a inclusión na rede de Transporte Metropolitano de Vigo no prazo máis breve posible. Unha vontade que xa fora manifestada por Antonio Lomba, alcalde da Guarda, no escrito remitido á Directora Xeral de Mobilidade o 22 de setembro de 2015 no que solicitaba un estudo de custos deste servizo.
Este acordo refírese soamente a solicitude da inclusión. No momento que se produza, de chegar a producirse, o Concello decidirá a súa participación naqueles servizos que resulten de interese para os veciños. Ademais, tal como aprobou o pleno, o acordo será trasladado á Xunta de Galicia, ó Concello de Vigo, a tódolos Concellos que constitúen a Área Metropolitana e ós concellos que sen estar nesta, aseguran a continuidade territorial entre A Guarda e Vigo (Rosal, Oia, Tomiño e Tui). Tamén se informará a tódolos grupos da Corporación Municipal dos pasos que se dean en relación ó acordo acadado. Así mesmo, o Concello da Guarda manifesta o seu interese en participar nas reunións informativas que se realicen co obxecto de poñer en marcha a Área.
Dende o concello considérase que diante de iniciativas como a constitución da Área Metropolitana os veciños da Guarda non poden quedar illados. Está claro que Vigo é a cidade de referencia da vila e, que de haber algunha obxección para a inclusión da Guarda na Área Metropolitana, esta sería a mellora das comunicacións por estrada; mellora que o Concello ten a intención de reclamar dende dentro da Área.
Ademais, o alcalde considera inxusto que os concellos do Baixo Miño non foran incluídos na redacción da Lei da Área Metropolitana para pertencer dende primeiro momento, con pleno dereito, a este ente.
