As Festas das Mercedes péchanse co II Trofeo Ciclista Aser Estévez

As Festas das Mercedes da Gándara chegan á súa fin co II Trofeo Ciclista Aser Estévez. O sábado 27 de setembro celébrase esta nova edición da carreira ciclista cun circuíto urbano pola Gándara.

Os ciclistas, con participantes de Galicia e Portugal, partirán da praza dos Xeixiños e rematarán na mesma tras un percorrido de 1,1km.

A partir das 14:30 horas arrancarán as carreiras das diferentes categorías: promesas, principiantes, alevíns, infantís, cadetes, féminas, júniors, másters (30-40-50-60), elite e sub-23.

Por este motivo, haberá restricións de tráfico na estrada da Gándara, e nas rúas Redondiña e Avenida de Francisco Lomba durante a tarde do sábado.