O Concello da Guarda aposta pola mellor mobilidade do cidadán coa peonalización da rúa Rosalía de Castro

O Concello da Guarda iniciará co 2026 unha nova e importante obra: a peonalización da rúa Rosalía de Castro, no entorno da Alameda da Guarda. Trátase dunha intervención para a mellora e recuperación do espazo para os peóns.

Coa obra preténdese mellorar a accesibilidade e seguridade dun tramo que concentra moita actividade peonil a diario: é itinerario para unir o núcleo urbano con servizos como o Centro de Saúde, Centro Cultural, centros escolares ou piscina. Ademais, trátase do entorno dunha das zonas de xogos máis importante para as crianzas guardesas e a unión entre Camposancos e A Guarda pola que pasa o Camiño de Santiago.

Coa peonalización instalaranse zonas de sombra e zonas verdes, así como bancos e xardineiras, apostando por un espazo para as persoas. A renovación tamén se realizará no sistema de saneamento e canalización, así como dos elementos de drenaxe e iluminación.

O alcalde da Guarda, Roberto Carrero, resalta que “queda de manifesto a nosa aposta por mellorar o entorno do casco urbano”. “É unha zona onde xa se mellorou o aparcamento do lado e ampliouse o parque infantil para mellorar a vida dos cidadáns”, afirma o alcalde.

A obra dará comezo en 2026 e rematará a mediados de ano, pero xa deron comezo os traballos previos coa mellora da integración paisaxística do muro de pedra da rúa Rosalía de Castro, cun orzamento de 48.050€; mentres que o orzamento da peonalización ascende aos 375.000€.

Estas actuacións serán financiadas a través do Convenio Interadministrativo entre a Axencia Turismo de Galicia e o Concello Guarda para a execución do Plan de Sostibilidade Turística en Destino da Guarda, no Marco do Plan de Recuperación, Transformación e Resiliencia, financiado pola Unión Europea-NEXTGENERATIONEU.