CONTINÚA A RUTA GASTRONÓMICA “TAPEARTE” EN DEZANOVE ESTABLECEMENTOS DA GUARDA
A ruta de pinchos “Tapearte” continúa ata este fin de semana nos dezanove bares e restaurantes da Guarda adheridos ó evento. Nos locais que forman parte desta ruta gastronómica serven durante estes días unha gran variedade e moita calidade nos seus produtos.
Por dous euros, os comensais poden, por exemplo, probar unha brocheta na que se combina o peixe espada con tomate e outras verduras acompañado dunha salsa de cítricos, uns pementos de piquillo recheos de marisco ou unhas xudías con perdiz. Tamén poden saborear unha empanada de tortilla, uns saquiños recheos de carne ou uns chipiróns con arroz.
Nos primeiros días de “Tapearte” os hostaleiros afirman que a pesar de que lle custou “arrancar”, agora son moitas as persoas que se interesan polas diferentes tapas que se ofrecen. Pola súa banda, os comensais, valoran a calidade de cada un dos pinchos e a delicada presentación dos mesmos.
Entre as persoas que se acheguen a probar as diferentes tapas se realizará un sorteo no que poderán gañar un fin de semana para dúas persoas no Parador de Tui, outra estancia no Hotel Molino da Guarda, e outra no Aparthotel Marouco, tamén da localidade guardesa.
Ata o domingo, día 14, todos aqueles que aínda non tiveran ocasión de probar as tapas, ou os que queiran repetir algún dos pratos, teñen tempo para saborear estas elaboracións. Tanto en horario de mañá, de 12 a 13,30, coma de tarde, de 19 a 21 horas, os locais ofrecen estas tapas.
