O TocaMúsica ofrece o mellor plan para rematar a tarde con concerto

Seguimos avanzando no programa TocaMúsica, xa co terceiro concerto desta cita musical.

Litus, Novoa, e Pirata. O cincuenta por cento da Banda de Late Motiv, tocarán o xoves día 10 na Praza do Reló. Será un “show” de tres amigos para rir, bailar, e gozar dos mellores temas de sempre.

Litus repite este ano no TocaMúsica tras a súa actuación hai un ano en solitario na rúa Vicente Sobrino. Este ano, acompañado con Novoa e Pirata, prometen un concerto caracterizado pola elegancia, bo gusto, e moito talento sobre o escenario.

“TocaMúsica é un programa que nos permite levar a música a diferentes recunchos e rúas da vila” declara o alcalde, Roberto Carrero, “o que sempre dá ledicia e boa ambiente ás nosas rúas e veciñanza”.

O programa TocaMúsica pretende ser unha cita que marcar na axenda, un evento divertido, onde a música é a protagonista e no que compartir un espazo público e un momento de ocio con amigas e amigos.

Coa estrea do grupo local Ínsua Band na anterior cita, e co bo acollemento de Mambas Negras a finais de maio, agárdase, de novo, un concerto cheo de bo ambiente.

Este programa porá fin xa en agosto co concerto de Wonder Covers. TocaMúsica conta co apoio do plan +Provincia.