Últimos días para desfrutar do Maio Gastronómico da Guarda

Neste mes de maio que está a piques de rematar, A Guarda preparouse para recibir a época estival cunha completa oferta de actividades culturais e gastronómicas encadradas na celebración, como en anos anteriores, do Maio Gastronómico e Cultural.

Neste mes de maio que está a piques de rematar, A Guarda preparouse para recibir a época estival cunha completa oferta de actividades culturais e gastronómicas encadradas na celebración, como en anos anteriores, do Maio Gastronómico e Cultural.

Durante todo o mes buscouse impulsar a unión entre a axenda cultural e unha campaña gastronómica que fixeran desfrutar aínda máis da vila ós guardeses e guardesas e a todos os visitantes que se achegaran nestes días.

Esta iniciativa chega ao seu fin coa última semana do mes que tamén é a máis destacada, pois este ano coincide nesta fin de semana a Festividade do Santísimo. Así, todos os que se acheguen á Guarda o sábado 28 de Maio para contemplar como se fan as alfombras florais ou o domingo 29 á Procesión do Santísimo poden aproveitar os últimos días da campaña gastronómica.

Grazas a esta campaña quen decida comer ou cear nun dos restaurantes adheridos recibirá un agasallo conmemorativo da nosa vila. É necesario presentar un bono que se pode conseguir na oficina de turismo, na caseta de cobro do Monte Santa Trega, no MASAT e no Museo do Mar. Os restaurantes participantes son: Area Grande, Brisamar, Carla, Casa do Outeiro, Casa Valladeiro, Pizzicata, Marusía, Mar y Cielo, Novo Funil, O Cangrexal, Xeito.

Non obstante a oferta gastronómica seguirá tendo o seu espazo na vila tamén o vindeiro mes, pois este xoves ás 12h na Casa dos Alonsos preséntase “Tapearte A Guarda” que durante os venres, sábados e domingos dende o 27 de Maio ata o 26 de Xuño, ofrecerá ós clientes dos establecementos adheridos tapas especiais a un prezo de 2€/tapa ademais de participar en sorteo de agasallos.