Resumo do Nadal 2015
A iniciativa “Decora o teu Nadal” fixo que A Guarda lucise grandes adornos
O Concello da Guarda, xunto a todos os veciños e veciñas da vila, despiden o Nadal 2015 tras unhas semanas con moitas e moi diversas actividades. Este ano foron moitas as iniciativas que fixeron destes días unhas datas moi especiais para compartir coa familia e amigos.
O Concello quixo que os veciños e veciñas da localidade os que participasen de forma activa na celebración deste Nadal. Así, unha das iniciativas máis exitosas foi “Decora o teu Nadal” na que as diferentes asociacións locais adornaron as diferentes rúas e prazas guardesas.
Estes adornos, nos que se diferenciaba a casa do Apalpador ou un coro de música, entre outros, xunto coas luces colocadas por toda a vila, fixeron que A Guarda lucise dunha maneira moi especial.
Ademais a música na rúa da man do grupo Xamaraina ou da charanga de Os Zanfonos, xunto co fío musical, ambientaron a localidade.
Os comerciantes tamén participaron deste Nadal a través dunha campaña comercial na que, Papa Noel, repartía entre os veciños e tamén visitantes, diferente sobres con publicidade ou descontos entre os diferentes comercios adheridos. Máis de corenta establecementos participaron nesta actividade.
Os nenos e nenas foron, e son, unha parte primordial destas datas polo que, o Concello, programou diferentes actividades para que os máis pequenos da casa foran unha parte activa neste Nadal. Así rapaces e rapazas en diferentes obradoiros decoraron as árbores de Nadal da Casa Consistorial, fixeron diferentes adornos para a recepción dos Reis Magos e fabricaron unha zambomba artesanal.
Ademais houbo cinema e diferentes obras teatrais no Centro Cultural especialmente para eles.
O teatro tamén foi unha actividade para os adultos. Así, cunha media de 150 espectadores por función, A Guarda acolleu a novidosa e exitosa obra “Pan Pan” e a sorprendente “Noiteboa”.
Na programación tamén houbo sitio para o deporte. O 27 de decembro celebrouse “IV Carreira Solidaria” na que máis de cen corredores percorreron a zona do porto da vila pasando pola Senda Litoral e a praia de A Lamiña.
Reis Magos
O mal tempo impediu que os Reis Magos de Oriente puideran percorrer A Guarda en cabalgata pero non que recibisen a todos os nenos e nenas da localidade. Así, o 5 de xaneiro, na Casa dos Alonsos, celebrouse a Gran Recepción Real.
Case 700 rapaces e rapazas puideron saudar e falar con Melchor, Gaspar e Baltasar nunha moi eloxiada recepción.
Durante tres horas os Reis Magos estiveron escoitando os desexos dos nenos e nenas e facéndolles entrega de caramelos e un pequeno agasallo.
En total case trescentos quilogramos de caramelos acompañados de música da charanga Os Zanfonos e do grupo de Gaitas da Terceira Idade e os bailes de Xamaraina, repartíronse nesta data.
O Concello da Guarda quere agradecer a todos os veciños e veciñas da localidade a súa participación neste Nadal e espera que o 2016 sexa un ano moi próspero para a vila e os seus habitantes.
