A Guarda aproba a Ordenanza Xeral Reguladora das Subvencións Municipais por concorrencia competitiva

O Concello da Guarda aprobou a primeira Ordenanza Xeral Reguladora das Subvencións Municipais por concorrencia competitiva, respectando os principios de publicidade, libre concorrencia, igualdade para a realización de actividades e utilidade pública e de interese social, para a promoción e consecución de fins de interese público de competencia local e para axuda e promoción en determinados ámbitos de interese social e cultural ou deportivo, de acordo co que prevé o Plan Estratéxico de Subvencións do Concello da Guarda.
Esta ordenanza foi consensuada por todos os grupos que conforman o plenario do concello da Guarda e acadou o apoio de toda a corporación na aprobación inicial, con posterioridade se presentou unha alegación que supuña unha enmenda á totalidade da ordenanza e que foi rexeitada no Pleno do pasado 1 de outubro.
A ordenanza entrará en funcionamento en canto sexa publicada oficialmente no BOPPO nun prazo aproximado de 15 días hábiles.

O alcalde da Guarda, Antonio Lomba quere “destacar o compromiso do concello en seguir facendo esforzos por acercar a colaboración do concello a aquelas entidades que desenvolven proxectos de interese social, deportivo ou cultural para a cidadanía guardesa. Non se pode entender a nosa localidade sen ter en conta todo o traballo que día a día desenvolven centos de veciños en proxectos comunitarios, que serven para darlle prestixio á nosa vila e posibilitan unha riqueza cultural e deportiva sen parangón. Moitas destas entidades teñen unha importancia estratéxica xa que son referentes nos seus ámbitos. No ámbito social é encomiable a labor desinteresada dos diferentes colectivos da localidade que procuran solucionar situacións de precariedade para moit@ veciños”.