O CONCELLO DA GUARDA LIMPA AS SÚAS PRAIAS
Traballadores do Concello da Guarda levan máis de 15 días limpando os diferentes areais da localidade.
En total, durante as quince xornadas de traballo nas praias, recolleron uns oitenta sacos de paus, madeira e outros restos chegados ás praias polas correntes do río. O que significa un volume aproximado de 80 metros cúbicos.
Sete persoas traballaron arreo dende a praia do Puntal ata os Estaleiros. Así, no verán estes areais poderán lucir a súa mellor versión para o desfrute dos veciños e veciñas da Guarda, pero tamén para os miles de visitantes que cada ano pasan as súas vacacións nesta localidade, e gozan das súas praias.
Diariamente tamén se traballa na limpeza das praias urbanas de Area Grande, Carreiro e Fedorento.
A Guarda aposta pola limpeza manual de tódalas praias da vila para minimizar o impacto negativo que pode supoñer esta posta a punto sobre a flora e a fauna. Ademais esta forma de facer contribúe a crear unha mellor conciencia na conservación e protección do entorno natural.
Entre os traballos tamén se encontra a instalación dos contedores para a recollida selectiva nos diferentes areais guardeses. A finais desta semana espérase que se termine coa súa colocación.
Este Concello conta, no 2015, con dúas bandeiras azuis, tanto na praia de O Muíño como en Area Grande. Ademais, o areal fluvial por excelencia da Guarda, conta tamén coa bandeira “Ecoplaya” que certifica a súa calidade dende un punto de vista ambiental. Unha das moitas premisas para conseguir este galardón, é, sen dúbida, que a limpeza da area sexa feita a man.
Ademais este Concello conta cun Sendeiro Azul, que recorre a costa unindo ás praias de O Muíño e Area Grande. Esta senda, que percorre 5,6 quilómetros, permite os paseantes descubrir os valores naturais e etnográficos da localidade.
