A Guarda afianza a execución do seu Plan de Sustentabilidade Turística (PSTD)

A comisión de seguimento do Plan de Sustentabilidade Turística en Destino (PSTD) reuniuse este xoves no Concello da Guarda coa participación de representantes da administración local e da Axencia de Turismo de Galicia.

O alcalde, Roberto Carrero, presidiu a comisión na que participaron os concelleiros, Oscar Álvarez e Isidro Lomba, ademais de persoal técnico municipal. Representando á administración autonómica estiveron Marta Trebolle, Xefa da Área de Calidade e Proxectos Europeos, e Iván Meléndez, Director de Competitividade de Turismo de Galicia.

A xuntanza serviu para avaliar o estado actual do proxecto, revisar o cronograma previsto e coordinar os próximos pasos de cara ao inicio da fase de execución, constatando que se materializarán coas primeiras licitacións previstas para o ano 2025.

O convenio de colaboración, asinado en 2023 entre a Axencia de Turismo de Galicia e o Concello da Guarda, contempla unha subvención de 1.000.000 €, financiada ao 100% con fondos europeos NextGenerationEU.

O goberno local traballou de xeito continuo na adaptación técnica e administrativa do plan, garantindo que as actuacións previstas poidan levarse a cabo con plena seguridade xurídica e operativa.

O alcalde da Guarda, Roberto Carrero, destacou tras a reunión que “o obxectivo dende o primeiro momento foi claro: facer as cousas ben para asegurar que este investimento europeo se traduza en melloras reais para A Guarda. Hoxe podemos dicir que ese traballo está feito, e que o plan está preparado para comezar a executarse no vindeiro ano”.

Carrero subliñou ademais que o Plan de Sustentabilidae Turística “representa unha oportunidade moi importante para avanzar cara a un modelo turístico máis equilibrado, que coide a nosa contorna, potencie os nosos recursos e xere beneficios para toda a cidadanía”.

As actuacións previstas céntranse principalmente na contorna do porto, no dique norte, e do Museo do Mar, coa mellora e restauración destes espazos, así como humanizacións no casco urbano e melloras na mobilidade. O obxectivo é promover unha vila máis amable e sustentable, poñendo en valor o Camiño Portugués da Costa e outros elementos de interese cultural e turístico.

Entre as accións atópanse a creación dunha área de autocaravanas na contorna do Museo do Mar, un aparcadoiro disuasorio que axudará a reducir o tráfico e mellorar a calidade do aire no centro, a humanización e acondicionamento da rúa Rosalía de Castro ou a conexión da rede de sendas peonís. Ademais, inclúese unha intervención no eido enerxético con melloras no alumeado público. Con estas e outras actuacións complementarias que se están a impulsar dende o Concello, a zona experimentará unha renovación integral, con beneficios non só para o sector turístico, senón tamén para a calidade de vida da veciñanza.

Con esta reunión, o Concello da Guarda consolida un novo paso na folla de ruta do plan, que incluirá actuacións orientadas á valorización do patrimonio, a mobilidade sostible, a dixitalización e a mellora dos servizos turísticos, todo isto con criterios de sustentabilidade e proxección de futuro.