A Guarda convida a celebrar o Día Internacional do Libro Infantil

O Concello da Guarda, a través da Concellería de Cultura e da Biblioteca Pública Municipal, convida a toda a cidadanía a celebrar o Día Internacional do Libro Infantil na xornada deste xoves 2 de abril cunha lectura cos máis pequenos da casa a través da plataforma https://www.galiciale.gal/.

A iniciativa pretende promocionar os bos libros infantís e xuvenís e a lectura entre os máis novos.

GaliciaLe é a plataforma de préstamo de libros, revistas, audiolibros e películas en formato electrónico das bibliotecas públicas galegas que ten por obxectivo facilitar o acceso de toda a cidadanía á cultura.

GaliciaLe proporciona un servizo de préstamo temporal de obras en formato dixital de temáticas diversas no que os intereses de todas as persoas lectoras terán o seu espazo (ficción, informática, historia, ocio etc.) e todas as idades o seu lugar.

En GaliciaLe o lector atopará dous catálogos: un que contén o “Catálogo galego” e outro que aloxa o “Catálogo en castelán”. As obras incluídas nestas dúas contornas poderán lerse e visionarse en dispositivos compatibles: tabletas, teléfonos móbiles e ordenadores persoais. No caso dos libros, poderá facelo, ademáis, desde un lector de libro electrónico.