A Guarda e O Rosal emiten un comunicado en prol da resolución do conflito laboral en IKF

O alcalde do Concello da Guarda, Antonio Lomba, e a alcaldesa do Concello do Rosal, María del Carmen Alonso, reuníronse esta mañá con representantes do Comité de Empresa de IKF España S.A. para emitir un manifesto conxunto a favor da resolución do conflito laboral na empresa.

No comunicado, ambos rexedores locais manifestaron, a instancia dos traballadores, o seu «total apoio ao centro de traballo», situado na antiga fábrica das Cachadas. Para os gobernos municipais «é motivo de preocupación o conflito laboral que manteñen na actualidade os traballadores e a dirección da empresa», aseguraron, lembrando que «este centro de traballo ven empregando a moitos veciños da Guarda e O Rosal dende fai máis de 100 anos, sendo un importante centro de emprego e sustento para moitas familias da comarca dende comezos do século XX ata o día de hoxe».

Os responsables das corporacións municipais lamentaron a situación, alegando que os acordos baseados no diálogo e a comunicación benefician a ambas partes, «acordos que fixeron que a empresa fora o pulmón de moitas familias». Dende o punto de vista social e económico, engadiron, «As Cachadas é importante para unha comarca como a nosa, que non destaca pola súa actividade industrial».

Con todo, dende os Concellos da Guarda e O Rosal solicitaron a mediación da Consellería de Economía, Emprego e Industria da Xunta de Galicia, co obxectivo de que esta facilite o entendemento entre as partes. «Instamos, en definitiva, a que a empresa e os traballadores cheguen a un punto de encontro que garanta o futuro do centro de traballo», concluíron.

Ao encontro asistiron os membros do comité de empresa, Carlos Pérez (secretario), Jesús Lomba e Florencio González.