A Guarda participa na Limpeza Simultánea de praias convocada por ADEGA

O vindeiro sábado día 16 de outubro o Concello da Guarda e a Agrupación O Buxeiro adhírense á convocatoria galega de Limpeza Simultánea de Praias convocada pola Asociación para a Defensa Ecolóxica de Galiza (ADEGA).
No caso da actividade na Guarda, estenderase máis aló das praias fluviais e marítimas para tentar recoller o lixo existente ao longo da zona costeira entre o noso municipio, pero tamén nos municipios do Rosal e de Oia.
Os participantes manterán unha reunión previa ás 9:00h da mañá na Alameda da Guarda, onde se explicarán os diferentes puntos de recollida ao longo da zona costeira, faranse os diferentes grupos e repartirase o material necesario(luvas e bolsas de recollida do lixo).
Na Guarda xa se estableceron 4 puntos para a recollida, a zona do Puntal, a zona da EDAR, a zona da Praia da Area Grande e a zona da Cetárea Redonda. No Rosal a limpeza costeira realizarase nas zonas de Portecelo e Amiadelo e en Oia nas zonas de Punta Orelludas, desembocadura río Vilar e Mosteiro.
As diferentes zonas se poden visualizar a través do seguinte mapa: https://www.google.com/maps/d/edit?mid=1zMumJtZycPCIROyDrLPLOPdTelxclvw_&usp=sharing