A Guarda recoñece a Tito Lemos como Fillo Adoptivo

• Será nun pleno extraordinario que terá lugar ás 12:00h na Casa dos Alonso.
• Tamén se descubrirá un busto realizado por Magín Picallo na que será dende este sábado a Praza Tito Lemos na Rúa Manuel Álvarez.

O Concello da Guarda e a Asociación Pro-Homenaxe “Tito Lemos”, continúa coas accións para por en valor a figura do médico falecido en novembro de 2019, tendo en conta a súa ampla traxectoria profesional e o seu compromiso e adicación coa cidadanía guardesa, ben coñecida por todos os guardeses e guardesas, cunha actitude sempre cordial e servicial que deixou pegada nos seus pacientes, familiares e amigos.

Joaquín Lemos Zunzunegui “Tito Lemos”, destacou sempre pola súa calidade humana e é precisamente por este motivo polo que se creou na Guarda a Asociación Pro-Homenaxe “Tito Lemos” que pretende homenaxear a figura deste doutor na Guarda, pola súa traxectoria profesional e persoal vinculada a esta vila, ademais do recoñecemento e agarimo dos seus pacientes e dos seus compañeiros de profesión.

Dentro das accións e obxectivos fixados pola Asociación, destaca o xa inaugurado observatorio no Monte Santa Trega, a declaración como fillo adoptivo na Guarda ou a colocación dun busto diante da que foi a súa clínica, dando o seu nome tamén á praza onde está ubicada.

Deste xeito o sábado día 15 de abril ás 12:00h, o Salón de Plenos acolle unha sesión extraordinaria cun único punto na orde do día, a declaración de Joaquín Lemos Zunzunegui “Tito Lemos” coma Fillo Adoptivo da Guarda, sesión plenaria que se poderá seguir en streaming na canle de Youtube do Concello da Guarda.

Unha vez rematada a sesión plenaria, realizarase a descuberta do busto realizado por Magín Picallo na que será dende este sábado Praza de Tito Lemos na Rúa Manuel Álvarez da Guarda.

Dende o Concello da Guarda e a Asociación Pro-Homenaxe “Tito Lemos” convídase a toda a cidadanía a participar nestas accións para manter viva a súa figura.