A Guarda súmase á «Hora do Planeta» co apagado do alumeado en espazos públicos

O Concello da Guarda sumarase á campaña «A Hora do Planeta», unha iniciativa impulsada pola ONG medioambiental WWF (World Wide Fund for Nature) na que se anima a apagar o alumeado durante unha hora a partir das 20:30 h do sábado 24 de marzo.

A acción simboliza a unión global contra o cambio climático e a prol da biodiversidade. A nivel individual, cada veciño e veciña poderá participar apagando as luces e os electrodomésticos do seu fogar, e as empresas tamén poderán unirse desenchufando os seus equipos de traballo. O Concello da Guarda, pola súa parte, apagará o alumeado da Praza do Reló e as rúas Vicente Sobrino e Brasilino Álvarez.

Dende a organización, sinalan que estamos vivindo os anos máis cálidos da historia, con prolongadas olas de calor e secas, fenómenos meteorolóxicos extremos cada ves máis frecuentes e desprazamentos de pobos debido ao cambio climático. Esta é xa, afirman dende WWF, unha das principais causas da perda de biodiversidade.

A Hora do Planeta

A campaña chega nesta ocasión a súa XII edición promovendo -en preto de 200 países e miles de cidades do mundo- estilos de vida sustentables, fomentando o desenvolvemento renovable para conservar os bosques, os mares e os recursos naturais, e loitando contra a perda da biodiversidade.

A iniciativa ven acompañada de toda unha serie de concellos e trucos para aforrar no gasto enerxético e consumir de xeito responsable no fogar, na cidade, no traballo e no campo. Deste xeito, con pequenos xestos, todos e todas podemos contribuír diariamente a manter a saúde do planeta.

Nesta mesma liña, a organización propón unha serie de xogos descargables para que as cativas e cativos de distintas idades poidan mellorar os seus coñecementos sobre o medio ambiente e o uso responsable dos recursos, tanto no fogar como na escola.