A Praza do Reló acolle o domingo 22 a Feira do Libro da Guarda

O vindeiro domingo, día 22 de maio, a Praza do Reló acollerá a Feira do Libro da Guarda. Trátase da 9ª edición dunha iniciativa na que librerías da Guarda e doutros concellos da comarca do Baixo Miño porán á venda os seus libros cun 20% de desconto durante todo o día.

O vindeiro domingo, día 22 de maio, a Praza do Reló acollerá a Feira do Libro da Guarda. Trátase da 9ª edición dunha iniciativa, subvencionada pola Deputación de Pontevedra, na que librerías da Guarda e doutros concellos da comarca do Baixo Miño porán á venda os seus libros cun 20% de desconto durante todo o día.

Un dos pratos fortes da xornada correrá ó cargo de Fran Rei, que se encargará de realizar a sesión de contos “OS CONTOS DA BARRIGA VERDE”. Esta dará comezo cara ás 12:30 horas e estará baseada en textos de Manuel María, o escritor homenaxeado este ano polo Día das Letras Galegas.

Xa pola tarde os visitantes poderán desfrutar, ás 19:30 horas, doutra das actividades destacadas da xornada: o espectáculo “Falar sen cancelas”. Nesta actuación os cómicos Pedro Brandariz, Fran Rei e Isabel Risco combinarán monólogos, representacións e diferentes xogos coa palabra e, sobre todo, o humor como protagonistas.

Entre as librarías que acudirán cos seus postos atópanse ATLÁNTICA, LER E CERVANTES da Guarda; MULTINOVAS E IDEAS, do Rosal e Libraida de Gondomar. Ademais tamén haberá un posto de intercambio de libros, tanto de adultos como infantís, no que os asistentes poderán deixar un libro que xa non queiran e levar outro a cambio.

A Feira concluirá ás 21 horas cun sorteo de libros que dará por finalizada unha das citas máis sinaladas do ano para librerías e lectores da Guarda.

PROGRAMA DA FEIRA DO LIBRO:

11.00.- Apertura dos postos das librerías

12.30.-”OS CONTOS DE BARRIGA VERDE”: sesión de contos baseada en textos de Manuel María, a cargo de Fran Rei

19.30.- “Falar sen cancelas”

21.00.- Sorteo de libros e Peche da Feira