A sesión de “Conversas coa Xuventude” afianza os lazos entre as asociacións da Guarda
Os veciños e veciñas da vila teñen que estar orgullosos do movemento asociativo guardés e do peso das entidades da localidade. Son moitos os voluntarios que a diario traballan para estas asociacións.
O venres celebrouse, na Casa dos Alonsos da Guarda, a última das sesións de “Conversas coa Xuventude” organizadas pola Concellería de Xuventude.
Neste encontro estiveron presentes os representantes das asociacións ConRazones, Avelaíña, San Xerome, Cruz Vermella e Érguete, ademais do alcalde guardés, Antonio Lomba e a Concelleira de Xuventude, Elena Baz.
O nome da sesión era “Solidariedade, diversidade, cooperación… e mocidade” e o que se pretendía era unha posta en común das diferentes asociacións falando dos distintos proxectos que están a levar a cabo, das súas necesidades e da importancia do voluntariado. Obxectivo máis que conseguido.
“Conversas coa xuventude” comezou ás 20,30 horas, e por quendas, os diferentes representantes foron falando das súas asociacións. Ano de creación, proxectos que se están a desenvolver, axudas institucionais e necesidades básicas das mesmas.
A partires de aí os temas que saíron foron, por exemplo, a importancia dos voluntarios. Todos os presentes estiveron de acordo cando se dixo que sen o traballo das persoas voluntarias a maior parte do traballo que fan as asociacións non se podería levar a cabo xa que non chegan as axudas institucionais.
Neste punto estiveron de acordo en que é un “luxo” que nunha vila coma A Guarda, con pouco máis de 10.000 habitantes, haxa tanta cantidade e variedade de asociacións e de tanto peso na localidade pero tamén en toda a comarca do Baixo Miño.
Este encontro, que se alongou ata pasadas as 22,30 horas, foi moi positivo para todos os presentes xa que serviu para afianzar os lazos entre as diferentes asociacións da Guarda.
Esta sesión serviu para que os representantes das asociación se deran conta da importancia de unha posta en común para poder realizar algunha tarefa en conxunto. Esta reunión serviu para que nun futuro se marquen outros encontros.
Esta última sesión de “Conversas coa Xuventude” foi a máis participativa. Como en encontros anteriores a reunión terminou coa entrega, por parte do alcalde Antonio Lomba e da Concelleira Elena Baz, de pequenos agasallos aos participantes.
