Aberto o prazo para solicitar a participación no programa termal «Benestar en balnearios»
O departamento de Servizos Sociais do Concello da Guarda informa de que xa está aberto o prazo para solicitar a participación no programa «Benestar en balnearios 2018» da Xunta de Galicia. As solicitudes poderán presentarse ata o 16 de maio (incluído) para as estadías e tratamento termais a realizar nos meses de maio e xuño, e ata o 30 de maio aquelas que se vaian desfrutar entre xullo e outubro.
Os requisitos para poder acceder ao programa son:
• Ser maior de 60 anos ou maior de 55. Neste último caso, debe reunir a condición de pensionista do sistema da Seguridade Social polos conceptos de xubilación, invalidez, viuvez ou outras pensións.
• Estar empadroado e residir nalgún concello da Comunidade Autónoma de Galicia.
• Valerse por si mesmo para as actividades da vida diaria e estar en condicións de participar no programa, agás no caso de fillos ou fillas que acudan en calidade de acompañantes.
• Non padecer alteración do comportamento que poidan afectar a normal convivencia nos establecementos , nin padecer enfermidade transmisible con risco de contaxio.
• Carecer de contraindicación médica para a recepción dos tratamentos termais.
• Acadar, de conformidade co baremo establecido, a puntuación que lle permita acceder a un dos balnearios e quendas solicitadas.
A persoa solicitante poderá ir acompañada do seu/súa cónxuxe, parella de feito ou persoa con que teña unha unión estable e de convivencia con análoga relación á conxugal, ou cun fillo ou filla con grao de discapacidade e autonomía de movemento, sempre que cumpran os requisitos arriba mencionados (a excepción do primeiro punto).
As persoas interesadas en participar no programa poderán informarse e realizar as súas solicitudes no departamento de Servizos Sociais do Concello da Guarda (de 9 a 13 h).
Sobre o programa
O programa termal «Benestar en balnearios» é unha iniciativa da Consellería de Política Social da Xunta de Galicia coa que se ofrecen alternativas de ocio que fomentan a autonomía e saúde das persoas maiores, favorecendo a un tempo as súas relacións sociais.
O programa ofrece un total de 679 prazas en 2018, nas que se inclúen a estadía en establecementos termais da comunidade en réxime de pensión completa e habitación dobre compartida, así como un recoñecemento médico e seguimento do tratamento termal prescrito.
