Actividades culturais con motivo do 25N na Guarda

• As actividades programadas terán lugar no Centro cultural da Guarda ás 20:30 h.

A continuación preséntase a programación de actividades culturais organizada polo Departamento de Cultura en colaboración co Centro de Información á Muller (CIM) do Concello da Guarda, con motivo do Día Internacional da Eliminación da Violencia contra as Mulleres,

O obxectivo desta programación é empregar a cultura como ferramenta de concienciación e de defensa da igualdade real de mulleres e homes, así como de rexeitamento frontal ante calquera forma de violencia machista.

As actividades programadas terán lugar no Centro cultural da Guarda ás 20:30 h e arrancan o día 4 de novembro, coa representación teatral de “As alumnas”, que veñen de recibir o Premio Nacional de Literatura Dramática.

As Alumnas, trata a historia de dúas alumnas da pedagoga María Barbeito, que se volven a atopar en 1970 trala morte da súa mestra, lembran a infancia e o  mundo que lles abriu  antes de que o Comité de Depuración afastase a María do seu traballo na escola. Elvira e Rosa son as dúas únicas alumnas que lle escribiron cartas contándolle o que foi das súas vidas. A través desas cartas, e da reconstrución daqueles tempos nos que eran as mellores amigas, iremos descubrindo como as decisións marcan o destino de cadaquén, e o medo, e a rebeldía. Ademáis deste percorrido íntimo os temas centrais da obra, son a memoria histórica, a educación e o retroceso que esta sufriu nos anos posteriores á Guerra Civil.

Continúan o día 16 de novembro co documental “Onde máis doe” do Ciclo Mestre Mateo. Este documental nos achega á cuestión da violencia vicaria, como outra forma de violencia contra as mulleres exercida polas súas parellas. Que move a unha persoa en pleno uso das súas facultades a matar a un fillo? Por que o feito de que unha muller non se someta e intente actuar pola súa cuenta pode alentar un castigo tan brutal? Sen dúbida un filme duro, baseado no asasinato dun neno a mans do seu pai, en Oza no 2017.

E como peche, o propio día 25 de Novembro, Día Internacional da Eliminación da Violencia contra a Muller, contaremos coa función de “Iphixenia na porta do súper”, un monólogo actual que fala das consecuencias dos recortes sociais a través da vida da súa protagonista, unha moza de barrio que pasa os días nun bucle de alcohol e apatía rondando as rúas da súa vila. Interpretada maxistralmente por Alba Caneda, a súa personalidade magnética e directa amosa sen filtros e con humor os dilemas da protagonista na súa particular historia de amor-desamor, nas decisións que lle seguen e as consecuencias finais as que se ve abocada polos recortes sociais.