O ciclo «Cinema de Nadal» trae dous novos filmes para o público infantil ao Centro Cultural

A primeira sesión será mañá, 28 de decembro, coa proxección de «Vaiana» ás 17:30 horas.

O ciclo de películas «Cinema de Nadal» retorna nestas datas con dúas novas achegas orientadas ao público familiar e infantil. A primeira sesión será mañá, 28 de decembro, coa proxección de «Vaiana» ás 17:30 horas no Centro Cultural. A película de animación conta a historia dunha intrépida rapaza, nada nunha pequena illa do Pacífico sur, que desexa navegar polo océano e coñecer mundo. Vaiana terá que loitar contra as tradicións e as imposicións da súa tribo para poder acadar os seus soños.

A programación de «Cinema de Nadal» continuará o próximo mércores 3 de xaneiro co filme «¡Canta!», unha divertida película de animación na que un koala, propietario dun teatro, trata de manter o seu negocio a flote organizando un concurso de canto no que participarán toda clase de animais. A cita será tamén ás 17:30 horas no Centro Cultural.

«Cinema de Nadal» é unha iniciativa da Concellería de Cultura que busca ofrecer espazos para gozar da cultura en familia e dun xeito ameno na nosa vila. O acceso é libre e gratuíto ata completar as prazas dispoñibles.