Éxito de participación nunha nova edición dos obradoiros “TARDEO” da OMIX da Guarda
Os obradoiros “TARDEO”, organizados pola OMIX do Concello da Guarda en colaboración con diversas asociacións do municipio, pecharon unha nova edición cunha excelente acollida durante os meses de abril e maio.
Esta iniciativa ten como obxectivo ofrecer actividades breves, dinámicas e participativas, desenvolvidas polas asociacións locais e dirixidas preferentemente á mocidade guardesa, aínda que abertas á participación de persoas de diferentes idades. Ademais de fomentar o lecer, os obradoiros permiten dar a coñecer o importante labor que desenvolven as entidades asociativas da Guarda e crear novos espazos de encontro e convivencia.
Nesta edición leváronse a cabo as seguintes propostas: “Elabora unha peza de ganchillo”, impartida pola Asociación Traxe Rexional da Guarda; “Boliñas de sementes”, a cargo da Asociación Foco Europa; e “Embárrate 3.0”, desenvolvido pola Asociación Avelaíña.
As tres actividades acadaron unha gran aceptación, esgotando todas as súas prazas pouco despois da apertura das inscricións. Esta resposta por parte da cidadanía evidencia o interese existente por este tipo de iniciativas e reforza a importancia de seguir apostando por actividades que fomenten a participación, a aprendizaxe e o coñecemento das asociacións locais.
Os obradoiros “TARDEO” constitúen tamén unha oportunidade para crear novas sinerxías entre a veciñanza e o tecido asociativo guardés, enriquecendo a vida social e cultural do municipio.
Dende o Concello da Guarda agradecen especialmente o compromiso e a implicación das asociacións participantes, que continúan apostando por esta iniciativa e contribuíndo ao seu éxito edición tras edición. Ademais das tres entidades que desenvolveron os seus obradoiros, nesta convocatoria tamén participaron o Club de Judo Baixo Miño e a Asociación Cultural Xida, que presentaron propostas para o mes de maio que finalmente non puideron levarse a cabo.
A boa acollida desta nova edición consolida os obradoiros “TARDEO” como unha actividade de referencia dentro da programación da OMIX, reforzando o seu papel como ferramenta para promover a participación xuvenil, o asociacionismo e a dinamización social na Guarda.
