Festa, manxares e moita música amenizarán a última fin de semana de agosto na Guarda
Unha fin de semana máis a Guarda prepárase para ofrecer a todos os seus veciños, veciñas e visitantes, unha ampla oferta de actividades culturais e de entretemento.
Unha fin de semana máis a Guarda prepárase para ofrecer a todos os seus veciños, veciñas e visitantes, unha ampla oferta de actividades culturais e de entretemento.
A última fin de semana do mes de agosto comeza cunha das citas máis destacadas deste verán na vila: o concerto do grupo de “De Vacas” este venres 26 de agosto ás 22 horas na Praza do Reló. Trátase dunha das 5 actuacións programadas dentro da primeira edición do festival Música nas Prazas. “De Vacas” ofrecerá as súas versións de cancións coñecidas nunha actuación que, en caso de chuvia, se trasladará ao Centro Cultural.
O sábado día 27 terá lugar o X Festival de Bandas “Vila da Guarda” organizado pola Agrupación Musical da Guarda en colaboración con concello da Guarda. Este incluirá as actuacións da Banda de Música de Salvaterra, da Banda “Airiños do Morrazo” e da Agrupación Musical da Guarda no Auditorio de San Benito ás 20 horas. En caso de choiva se celebrará no Colexio PP Somascos.
Ese mesmo día, o sábado ás 22,30 horas, terá lugar o VII Serán da Guía organizado pola Agrupación Folklórica Vento Mareiro. Neste serán grupos de música tradicional reúnense para tocar na Praza da Guía.
Ademais, durante toda a fin de semana, dende o venres 26 ata o domingo 28, celébrase a V Festa do Percebe e de produtos da terra e do mar, na Alameda da Guarda. Esta festa está organizada pola Asociación Veciñal Cultural e Deportiva O Cancelón e nela se poderá desfrutar do mellor da gastronomía da zona. A festa dará comezo o venres 26 das 21 ás 24 horas. Durante o sábado se poderán degustar estas delicias gastronómicas dende as 12 ata as 16 horas e pola noite das 20 ás 24 horas. Xa no domingo 28, último día desta festa, a festa comezará ás 11 horas da mañá.
Complétase así unha fin de semana na que a oferta gastronómica, cultural e de lecer segue a ser moi variada, con opcións para tódolos públicos, como ven sendo característico neste verán na vila da Guarda.
