Inauguración da XXXVI exposición filatélica e a XXII Exfimiño 2018 na Guarda
O xoves 11 de outubro a Casa dos Alonso da Guarda acolleu o acto de inauguración da XXXVI exposición filatélica e a XXII EXFIMIÑO que este ano estará adicada a conmemorar o 350 Aniversario da liberación da dominación portuguesa de A Guarda e do Castelo de Santa Cruz e que se poderá visitar ata o vindeiro 17 de outubro.
O acto de inauguración contou coas intervencións da Concelleira de Cultura, Elena Baz; a deputada provincial, Montserrat Magallanes; o Presidente da Sociedade Numismática e Filatélica Guardesa, Luciano Lomba; o Presidente de FEGASOFI, Valentín Suárez Alonso, o historiador local Joaquín Miguel Villa; así como a presenza de representantes doutras sociedades filatélicas, expositores, convidados e visitantes.
Como ven sendo habitual, a montaxe desta mostra realizase nos baixos da Casa dos Alonsos, edificio onde recentemente se instalaron as dependencias do Concello de A Guarda, contando con varias vitrinas cedidas pola Federación Galega de Sociedades Filatélicas e outros expositores con coleccións de selos, moedas e coleccionables varios, nas categorías de xuvenis, filatelia moderna, clase aberta, temática, maximofilia, tradicional e historia postal.
A mostra estará aberta en horario de maña de 11:00h a 14:00h horas e pola tarde de 17:00h a 20:00h horas.
No acto de inauguración púxose en circulación un selo personalizado, cunha imaxe do plano do castelo de Sta. Cruz, cedida por InfoMaxe e un cuño conmemorativo coa imaxe da entrada principal do castelo, inmortalizando esta edición 2018.
Dende o Concello da Guarda convídase á cidadanía e visitantes a aproveitar esta oportunidade única e visitar esta exposición ata o 17 de outubro.
Tag:A Guarda, exfimiño, Exposición, filatelia