O alcalde da Guarda solicita unha dragaxe urxente do río Miño e favorecer á súa recuperación

O alcalde da Guarda presentará mañá unha moción no pleno da Deputación para solicitar ao Goberno de España,a través do Ministerio para a Transición Ecolóxica, unha dragaxe urxente do río Miño ante a degradación do seu leito e outras medidas de coidado para favorecer a súa recuperación.

Para Roberto Carrero, “é fundamental que se tomen medidas entre España e Portugal aínda que nós loxicamente nos diriximos ao Goberno de España por ser a onde pertencemos, xa que a situación actual do río Miño está a causar importantes prexuízos socioeconómicos, pesqueiros, turísticos e de seguridade na nosa bisbarra”

Ante o claro empeoramento das súas condicións nos últimos anos, a dragaxe que se acometa debe ser dun xeito respectuoso para a preservación dos seus destacados valores medioambientais.

Ademais desta medida contra a sedimentación dos materiais, especialmente nas zonas máis próximas á súa desembocadura, tamén se solicita a adopción doutras medidas de coidado para favorecer a súa recuperación, como a erradicación das especies exóticas e invasoras que avanzan polas súas augas

Roberto Carrero explicou que tras preto de quince anos sen actuacións no leito do río, a súa situación deteriorouse moito, un aspecto confirmado polos concellos afectados, as asociación de pescadores e incluso a Comandancia Naval do Miño.

A sedimentación de materiais está suprimindo gran parte do leito e está a empeorar gravemente as súas condicións e a isto, engádese o avance de especies invasoras, con especial fincapé na labaza.

Todo elo está a causar graves problemas para a zona, como a supresión desde 2021 do ferri entre Camiña e A Guarda por falta de calado ou os problemas de seguridade que impedirían desenvolver unha eventual situación de rescate nas súas augas.