O Concello da Guarda busca o benestar mental do alumnado do IES A Sangriña

A OMIX do Concello da Guarda organiza durante o mes de febreiro o proxecto “Eu SaudableMente” no IES A Sangriña.

Este programa busca fortalecer e protexer a saúde mental do alumnado e o coidado e benestar da mocidade. As charlas e actividades estarán dirixidas pola psicóloga Andrea Iglesias ao alumando de 1º e 2º da ESO.

Nas diferentes xornadas do proxecto, os e as participantes enfocaranse na intelixencia emocional, no desenvolvemento da autoestima, na sexualidade positiva e na reflexión do uso das redes sociais.

Esta actividade diríxese á mocidade en idade de desenvolvemento da personalidade, das relacións afectivas e de crecemento e cambio físico. Deste xeito, poderán detectar posibles problemas emocionais propios ou na contorna e ser o axente e potenciador de cambio.