O Sábado 29 de xullo A Guarda acolle o gran espectáculo Concerto de Malabares
- A Agrupación Musical da Guarda e a compañía de circo Pistacatro aúnan as súas forzas para ofertar esta peza única á par que divertida
O vindeiro sábado 29 de xullo ás 20:30h. terá lugar no Auditorio de San Benito unha das grandes citas culturais deste verán. Un concerto onde os malabares serán os bailaríns deste ballet aéreo, ao ritmo dos clarinetes, saxos e trompetas da Agrupación Musical da Guarda, que farán de pintores dun cadro expresionista no que as bolas, mazas e aros debuxarán no ar os sentimentos e emocións que transmiten a música e o circo.
A nosa banda municipal e os seus músicos, fora da súa zona de confort, participarán case como actores, dun espectáculo teatral tocando temas e estilos fora do común, cun repertorio concibido e ensaiado para esta ocasión. Con instrumentos dourados, grandes tambores, pratillos, camisas brancas, uniformes e maxistrais obras, clásicas; pero tamén de pantalóns curtos, camisetas, gafas de sol, funk, blues, pop e punk. Dous mundos que parecen antagónicos, pero que como veremos maridan á perfección.
O espectáculo Concerto de malabares é na actualidade un dos proxectos máis orixinais e suxerentes no eido escénico en Galicia, concebido pola prestixiosa compañía de circo Pistacatro, está ideado para poder ser desfrutado por público de tódalas idades, albergando un especial valor familiar e educativo debido ó contido pedagóxico que inspira todo o proxecto. Sen dúbida a emoción e a diversión están garantidas, para crianzas, adultos, amantes da música, de pasar un bo rato e sobre todo para todo o que este aberto.
Este espectáculo é financiado parcialmente con cargo ao programa do AGADIC-XUNTA DE GALICIA “CULTURA NO CAMIÑO 2023” e para facerse realidade precisou do traballo conxunto da compañía Pistacatro e a Agrupación Musical da Guarda, que se remonta a principios de 2023. Desexamos que este esforzo se vexa recompensado coa satisfacción do público asistente o vindeiro sábado 29 de xullo ás 20,30h. No Auditorio de San Benito.
