Un Showcooking para por en valor a Lamprea do Miño na Guarda

O vindeiro venres día 5 de abril a Praza de Abastos da Guarda será o escenario para a realización dun Showcooking no que un restaurador da vila cociñará a lamprea do Río Miño elaborada coa receita tradicional “Á bordalesa”. Tamén se elaborará outra receita especial coa lamprea para que os asistentes a degusten gratuitamente.

Esta actividade gastronómica terá lugar entre as 11:00h e as 12:30h da mañá na planta baixa da Praza de Abastos da localidade, onde todos e todas que así o desexen poderán coñecer como elaborar este manxar do Río Miño, seguindo as instrucións dun profesional da hostalaría guardesa.

Este Showcooking está enmarcado nas fins de semana gastronómicas que se estenden ata o 14 de abril e no que se pode degustar a lamprea do Miño na súa preparación máis tradicional, á bordalesa, a un prezo único por ración de 22€. A lamprea enteira terá un prezo de 65€ nos restaurantes Area Grande, Arruaz, Brétema, Bar Casa Aquilino, Enxebre, La Pizzicata, Marbella, O Cangrexal, O Roxo e Xantar.