FIN DE SEMANA FESTIVO NA GUARDA
De novo esta fin de semana son moitas e moi diversas as actividades programadas no Concello da Guarda.
Ó ser o xoves, día 16, a Festividade Local pola Nosa Señora do Carme, a programación xa comeza hoxe.
A Comisión de Festas do Carme ten preparados pasarrúas pola mañá e unha gran verbena a cargo da orquestra “Jerusalén” e o grupo “Ismael”.
Mañá xoves, ás 11 horas terá lugar a procesión dende a Igrexa Parroquial ata o Porto onde se oficiará unha misa solemne cantada pola “Coral da terceira idade da Guarda”. Seguidamente será a Ofrenda floral ós náufragos, para terminar coa procesión de novo ata a igrexa.
Pola tarde, ás 19 horas comezará a “Regata de Gameliñas” e de seguido a actuación do grupo de música popular e folclórico de iberoamérica “A Misela”, chegados dende Vilagarcía de Arousa. Á noite a banda sonora a porá o grupo de folk guardés “Lareira”.
O venres, a mesma organización, ten preparado o “XIV Rock Guardés” que comezará ás 22,30 horas no Porto da Guarda e que se alongará ata altas horas da madrugada coas actuacións de Bieitosolo (fusión), do grupo “The Javi Bombín Experience Punk” (acústico), Jean Paul (rapcore), Úniko & Cronikk (rap) e Sapoconcho sem Poncho (Dj Set).
Por outra parte, tanto o sábado día 17 como o domingo, 19, o grupo de teatro “Vamola Andando” organizan dúas funcións da obra “Homes”. As citas son no salón de actos do Centro Cultural, o sábado ás 22 horas e o domingo ás 21 horas. Nesta ocasión non será necesaria a retirada de ticket previo xa que hai dobre función.
O sábado, pola súa banda, A agrupación Coral Polifónica da Guarda, organiza o “XXVIII Encontro Internacional de Corais da Ribeira do Río Miño”. Neste evento internacional, que comezará ás 21 horas no Auditorio de San Bieito, participarán sete coros de España e Portugal.
Por último, o domingo, o Concello ten organizado o “XXIV Concurso de Figuras de Area”. Este evento, no que poden participar todos os nenos e nenas de idades comprendidas entre os 3 e os 16 anos, terá lugar na praia do Muíño ás 12 horas, abríndose o prazo de inscrición unha hora antes.
