Dous atletas guardeses triunfan no Mundial de Maratón Master de Bucarest

Chégannos moi boas novas do Mundial de Maratón Master celebrado en Bucarest (Romanía) o pasado domingo 13 de outubro. Dos 40 atletas españoles que participaron, dous eran atletas guardeses.

José Carlos Ferreira González, máis coñecido como Ferre, completou os 42 km en 3:13:04, acadando un 25º posto. Ademais, o equipo español da súa categoría, M50, logrou ser o campión mundial.

Pola súa banda, José Antonio Vázquez Fernández, máis coñecido como Pepix, conseguiu acadar a súa mellor marca persoal, rebaixándoa sete minutos ata os 2:55:57. Deste xeito logrou un 21º posto e o equipo español da súa categoría, M40, logrou ser subcampión mundial.

Desde logo, ambos son exemplo da calidade do atletismo guardés, desde as categorías máis pequenas ata as master e en distancias tan complicadas como o maratón de 42 km.

Parabéns a estes dous atletas por todo o seu esforzo!